බැඳුම්කර මගඩියේ සැඟවුණු අමුත්තෝ

0
241

රාජ්‍ය ආයතනවල වංචා, දූෂණ හා අක්‍රමිකතා සිදු වූ විට ඉන් අගතියට පත්වන්නේ මහජනතාවයි. ඒවා නිසා රජයට සිදුවන අලාභවල බර පැටවෙන්නේ අතිමහත් බහුතර බදු ගෙවන ජනතාවටය. ඒ නිසා මෙවැනි වංචා දූෂණ හා අක්‍රමිකතා සිදු කිරීම මහජනතාවට කරන සතුරුකමකි. එවැනි වැරදි යට ගැසීම සහ ඒවාට වගකිවයුත්තන් ආරක්‍ෂා කිරීමද මහජනතාවට සිදු කරන සතුරුකමකි. ලංකා ඉතිහාසයේ ලොකුම මහජන මුදල් කොල්ලය ලෙස සැලකෙන බැඳුම්කර මගඩිය කළ අය මෙන්ම ඊට සෘජුව සහ වක්‍රව සම්බන්ධ අයගෙන් බොහෝ දෙනෙක්‌ට මේ වන විට චෝදනා එල්ල වී ඇත. තවමත් හෙළිදරව් නොවී සැඟවී සිටින අයද සිටී. ඒ නිසා බැඳුම්කර වගඩියට සෘජුව හා වක්‍රව වගකිවයුත්තන් මෙන්ම ඒ අය ආරක්‍ෂා කරන්නන් ද රටේ කවර තනතුරු සහ තානාන්තර දරමින් සිටියත් ඒ සියලු දෙනා මහජන සතුරන්ය. ජනාධිපති මෛත්‍රීපාල සිරිසේන මහතා පත්කළ බැඳුම්කර ජනාධිපති කොමිසමට, විශේෂයෙන් ඒ සඳහා කැප වූ නීතිපති දෙපාර්තමේන්තුවේ දප්පුල ද ලිවේරා සහ යසන්ත කෝදාගොඩ යන මහත්වරුන් ඇතුළු රජයේ නීතිඥ මණ්‌ඩලය සහ අනෙකුත් සියලු විමර්ශන නිලධාරීන්ට පිං සිදු වන්නට මේ මගඩියේ බොහෝ තොරතුරු හෙළිදරව් විය. එහෙත් අපට නම් හැඟෙන්නේ මේ සම්බන්ධයෙන් තවදුරටත් හෙළිදරව් විය යුතු බොහෝ දේ තිබෙන බවයි. විශේෂයෙන් දැනට හෙළිදරව් වී ඇති ප්‍රශ්නගත මුදල් චෙක්‌පත් ලබා ගත්තේ කවුද යන්න තවදුරටත් හෙළිදරව් විය යුතුව තිබේ.

අපට දැනගන්නට ඇති පරිදි අදාළ මුදල් චෙක්‌පත් සම්බන්ධයෙන් පුළුල් විමර්ශන සිදුවෙමින් තිබේ. ඒ ගැන තවමත් හෙළිදරව් නොවී සැඟවී සිටින අය දැන් බොහෝ කලබලයට පත් වී සිටිනවාද විය හැකිය. මේ හෙළිදරව් නොවී සිටින සැඟවුණ අමුත්තන් පිරිස හෙළිදරව් කර ගැනීම මේ මොහොතේ විමර්ශන නිලධාරීන්ගේ ප්‍රමුඛතම කාර්යභාරයක්‌ වී ඇති බව පෙනේ. මේ අය අතර සිටින්නේ පාර්ලිමේන්තුවේ මැති ඇමැතිවරුන් පමණක්‌ නොවේ. ඇතැම් විට අපට සිතා ගැනීමටත් අපහසු තවත් බොහෝ දෙනෙක්‌ ඒ අතර සිටින්නට පුළුවන. දැනට අපරාධ පරීක්‍ෂණ දෙපාර්තමේන්තුව විමර්ශනය කරගෙන යන මුදල් චෙක්‌පත් ලබාගත් අය හෙළිදරව් වීමේදී පාර්ලිමේන්තුවේ තවත් මැති ඇමැතිවරුන් මෙන්ම දේශපාලනඥයන් නොවන වෙනත් පිරිස්‌ද හෙළිදරව් වීමට ඉඩ තිබේ. දැනට කරන ලද විමර්ශනවලට අනුව ඩබ්ලිව්. එම්. මෙන්ඩිස්‌ සමාගම විසින් 2015.01.30 දින සිට 2016.09.30 දින දක්‌වා කාලයේදී නිකුත් කළ මුදල් චෙක්‌පත් ප්‍රමාණය 2487 කි. මේ ගනුදෙනුවල අසාමාන්‍ය බවද විමර්ශනයේදී හඳුනාගෙන ඇත. ඒ බව මේ වන විට අපරාධ පරීක්‍ෂණ දෙපාර්තමේන්තුව විසින් කොළඹ මහෙස්‌ත්‍රාත් අධිකරණයටද වාර්තා කර ඇත. ඉකුත් ජුලි 05 දින අපරාධ පරීක්‍ෂණ දෙපාර්තමේන්තුව විසින් උසාවියට ඉදිරිපත් කළ වැඩිදුර විමර්ශන වාර්තාවෙන් අනාවරණය කළ කරුණු බොහෝමයකි. ඒ ගැන මේ ලිපියෙන් අපගේ අවධානය යොමු වේ.

මහ බැංකු අධිපති ආචාර්ය ඉන්ද්‍රජිත් කුමාරස්‌වාමි මහතා විසින් 2016.11.25 දින අපරාධ පරීක්‍ෂණ දෙපාර්තමේන්තුවට කරන ලද පැමිණිල්ලක්‌ අනුව කොටුව මහෙස්‌ත්‍රාත් අධිකරණයේ විභාග වන මේ නඩුවට අදාළව දැනටමත් ඉතා වැදගත් තොරතුරු රැසක්‌ හෙළිදරව් වී ඇත. ඒ සම්බන්ධයෙන් නීතිපති දෙපාර්තමේන්තුව වෙනුවෙන් උසාවිය හමුවේ පෙනී සිටින ජ්‍යෙෂ්ඨ අතිරේක සොලිසිටර් ජනරාල් ජනාධිපති නීතිඥ යසන්ත කෝදාගොඩ මහතා ඇතුළු නීතිඥ කණ්‌ඩායමටත් එසේම අපරාධ පරීක්‍ෂණ දෙපාර්තමේන්තුවේ මේ නඩුව වෙනුවෙන් සහාය වන සියලුම විමර්ශන නිලධාරීන්ටත් ජාතියේ ගෞරවය හිමි වෙයි. දැනටමත් ඔවුන්ගේ එම මෙහෙවර නිසා බොහෝ ප්‍රතිඵල ලැබී තිබේ. එසේම ඉදිරියටත් මේ රටේ මහජනතාව වෙනුවෙන් ඔවුන්ගෙන් සිදු විය යුතුව තිබෙන මෙහෙවර අතිවිශාලය. මේ දෙය ඉටු කිරීමේදී මේ මගඩියට සෘජුව හා වක්‍රව සම්බන්ධ චෝදනා එල්ල වී ඇති පාර්ශවයන්ගෙන් නොයෙකුත් බලපෑම් එල්ල වීමට ද ඉඩ තිබේ. ඒ ගැන මහජනයාටද වැටහීමක්‌ ඇත. ඒ සියලු දේට මුහුණ දෙමින් අතිදුෂ්කර එහෙත් රටවැසියා වෙනුවෙන් යුක්‌තිය උදෙසා අත්‍යවශ්‍ය එම රාජකාරීමය මෙහෙවර නීතිපති සහ අපරාධ පරීක්‍ෂණ යන දෙපාර්තමේන්තුවල නිලධාරීන් ඉටු කරනු ඇතිය යන්න අතිමහත් බහුතර මහජනතාවගේ අපේක්‍ෂාවයි. ඒ නිසා මේ නඩු විභාගය දෙස අතිමහත් බහුතර මහජනයා ඉතා උනන්දුවෙන් බලා සිටී.

මේ නඩුවේ සැකකාර සමාගම වන පර්පෙචුවල් ට්‍රෙෂරීස්‌ සමාගම 2015.02.27 දින සිට 2018.02.02 දින දක්‌වා කාලය තුළ සියලුම බාහිර තැනැත්තන් හා සමාගම්වලට සෘජු හා වක්‍ර ලෙස කරන ලද ගෙවීම් සහ අන් ලෙසකින් ලබාදෙන ලද මුදල් සහ චංචල හා නිශ්චල දේපල පිළිබඳ විස්‌තර සහ එකී ලේඛන මෙන්ම ගිණුම් විශ්ලේෂණය කොට ලබා ගැනීම සඳහා ශ්‍රී ලංකා මහ බැංකුවේ අධිපති ආචාර්ය ඉන්ද්‍රජිත් කුමාරස්‌වාමි මහතා වෙත උසාවියෙන් නියෝගයක්‌ කර තිබිණි. ඒ අනුව විමර්ශනයට අදාළව සමාගම් කිහිපයක 2015.01.01 දින සිට 2018.05.24 දින දක්‌වා මුදල් සහ බැංකු පොත්වල මෘදු පිටපත් සහ ඒවායේ සියලුම ලැබීම් සහ ගෙවීම් සඳහා අදාළ මූලාශ්‍ර ලේඛන එනම් ගෙවීම් වවුචර්පත්, ලදුපත් සහ අනුමත කිරීම් ආදිය බැංකු වෙතින් විමර්ශන කටයුතු සඳහා ඉල්ලා ඇත. ඉකුත් ජුලි 05 දින අපරාධ පරීක්‍ෂණ දෙපාර්තමේන්තුව විසින් උසාවියට ඉදිරිපත් කළ පරිදි එම සමාගම් වන්නේ පර්පෙචුවල් ට්‍රෙෂරීස්‌ සමාගම, පර්පෙචුවල් ඇසෙට්‌ මැනේ-මන්ට්‌ සමාගම, පර්පෙචුවල් කැපිටල් පුද්ගලික සමාගම, පර්පෙචුවල් කැපිටල් හෝල්ඩිංග්ස්‌ පුද්ගලික සමාගම සහ ඩබ්ලිව්. එම්. මෙන්ඩිස්‌ සමාගම යන සමාගම්ය.

ඉහත සඳහන් කළ කාලයට අදාළව මේ සමාගම්වල බැංකු ප්‍රකාශනවල පිටපත්, විගණනය කළ හා නොකළ මූල්‍ය වාර්තාවල පිටපත්, සහ එම සමාගම් විසින් නිකුත් කරන ලද සහ උපලබ්ධි වූ චෙක්‌පත්වල මෘදු පිටපත් (cheque Images) යනාදියද බැංකුවලින් මේ වන විටත් අදාළ විමර්ශනය සඳහා ඉල්ලා තිබේ. එහෙත් රහස්‌ පොලිසිය ජුලි 05 දින කොටුව මහෙස්‌ත්‍රාත් අධිකරණයට ඉදිරිපත් කළ වැඩිදුර විමර්ශන වාර්තාවෙන් උසාවියට දැනුම් දී ඇත්තේ එසේ ඉල්ලූ ඇතැම් තොරතුරු ඒ දක්‌වා අපරාධ පරීක්‍ෂණ දෙපාර්තමේන්තුවට හෝ ශ්‍රී ලංකා මහ බැංකුවට ලබාදී නොමැති බවයි. මේ තොරතුරු ඉල්ලීමට ප්‍රතිචාර ලෙස ඇතැම් බැංකු ඉහත කී සමාගම් සමඟ බැංකු ගනුදෙනු හෝ බැංකු ගිණුම් පවත්වාගෙන ගොස්‌ නොමැති බවද දැනුම් දී තිබේ. මේ අතර ඇතැම් බැංකු ඉල්ලා ඇති තොරතුරුවලින් තවමත් ලබා දී ඇත්තේ කොටසක්‌ පමණි. තවත් බැංකු 20 ක්‌ ඒතාක්‌ (ජුලි 05 දින දක්‌වා) තොරතුරු ලබාදීමට අපොහොසත් වී ඇති බවද ශ්‍රී ලංකා මහ බැංකුවේ විමර්ශන නිලධාරීන් කණ්‌ඩායම අපරාධ පරීක්‍ෂණ දෙපාර්තමේන්තුව වෙත වාර්තා කර ඇත. මේ අනුව අධිකරණ නියෝග ප්‍රකාරව එම විමර්ශනය කිරීමට අවශ්‍ය සියලු තොරතුරු ඒ දක්‌වා බැංකුවලින් ලැබී නොතිබීම නිසා පරිපූර්ණ විමර්ශනයක්‌ සිදු කිරීමට හැකි වී නොමැති බවද අපරාධ පරීක්‍ෂණ දෙපාර්තමේන්තුව විසින් උසාවියට වාර්තා කර ඇත.

මහ බැංකු අධිපතිවරයාට ලබාදුන් උසාවි නියෝගයට අනුව එම නියෝගය ක්‍රියාත්මක කිරීමේ මූලික පියවරක්‌ ලෙස මහ බැංකු අධිපති ආචාර්ය ඉන්ද්‍රජිත් කුමාරස්‌වාමි මහතා විසින් මහ බැංකු නිලධාරීන් කණ්‌ඩායමක්‌ පත් කර ඇත. ඔවුන් විසින් මේ සම්බන්ධයෙන් විමර්ශන කටයුත්තක්‌ ආරම්භ කර ඇති අතර ඒ අනුව ඇතැම් ලේඛන පදනම් කර ගනිමින් පර්පෙචුවල් ට්‍රෙෂරීස්‌ සමාගම විසින් භාණ්‌ඩාගාර බැඳුම්කරවලින් උපයා ගන්නා ලද මුදල්වලින් කොටසක්‌ තුන්වන පාර්ශවයන්ට ප්‍රේෂණය කිරීම සහ ලබාදීම සම්බන්ධයෙන් මූලික විමර්ශනයක්‌ ආරම්භ කර තිබේ. එම විමර්ශනයෙන් දැනටමත් අනාවරණය කරගෙන ඇති නිරීක්‍ෂණයන් ගණනාවක්‌ද ඉකුත් ජුලි 05 වැනිදා රහස්‌ පොලිසිය විසින් උසාවියට දැනුම් දුන්නේය. මෙහි එක්‌ නිරීක්‍ෂණයකට අනුව ඩබ්ලිව්. එම්. මෙන්ඩිස්‌ සමාගමේ ගිණුම් ප්‍රකාශන පරීක්‍ෂාවේදී එම සමාගම විසින් ලංකා බැංකුවේ පවත්වාගෙන යන ලද 0000000805 දරන ගිණුම යටතේ 2015.01.30 දින සිට 2016.09.30 දින දක්‌වා කාලය තුළදී මුදල් චෙක්‌පත් (Cash cheque) 2487 ක්‌ නිකුත් කර ඇති බව අනාවරණය කරගෙන තිබේ. එම මුදල් චෙක්‌පත් සියල්ලේ වටිනාකම රු. මිලියන 1134 ඉක්‌මවන අතර එසේ නිකුත් කරන ලද මුදල් චෙක්‌පත් අතර වටිනාකම රු. මිලියන 20 කට ආසන්න මුදල් චෙක්‌පත් පවතින බවද විමර්ශන නිලධාරීහු හඳුනාගෙන ඇත. එසේම වටිනාකම රු. මිලියනයක්‌ හෝ ඊට වැඩි චෙක්‌පත් 325 ක්‌ පවතින බවද නිරීක්‍ෂණය කර ඇත. විශේෂම කරුණ නම් මේ චෙක්‌පත් නිකුත් කිරීම සමාගමේ සාමාන්‍ය ගනුදෙනු අතරේ එලෙස සිදු විය නොහැකි අසාමාන්‍ය ගනුදෙනු බවද එම විමර්ශන නිලධාරීන් කණ්‌ඩායම විසින් හඳුනාගෙන තිබීමයි. ඒවා අසාමාන්‍ය නම් එම ගෙවීම් මොනවාද සහ ඒ ගෙවීම් ලබා ගත්තේ කවුද යන ප්‍රශ්නය නිතැතින්ම ඇති වන්නකි.

 ශ්‍යාම් නුවන් ගනේවත්ත

LEAVE A REPLY

Please enter your comment!
Please enter your name here